放生一定要念的咒语，最简单的放生三句？

偶尔，翻到了一张旧报纸，旧闻里厢就讲了一桩“放生”格事体。

上海人讲放生有两层意思：一、侬讲闲话勿算数，呒么信用，放白鸽、侬勿来还要让人家空等、空欢喜。 另外一层意思就是：放拨人家一条生路，让自家也能够过得去！

相信菩萨格朋友，多多少少

有放生格经历，凭啥？凭自家格良心。为啥？让自家能安心。拨庙里厢师傅讲起来，道理是交交关关了，为了积福积善啊，为了释放压力啊，为了治病延寿啊，为了改变命运啊，为了消灾解难啊，为了挽救生灵啊，为了清除业障啊，……，多了，有千理万由，总而言之，侬只要侬放生就可以解决自家格心头之愿了！

勒了青浦朱家角有一座“放生桥”，名气响得“刮辣辣”，一到双休日，勿管是初一、还是月半，桥浪厢是人山人海，到了节假日是苦煞脱保安，必须出动加强班，严阵以待，高音喇叭里厢是“哇拉哇拉”提醒大家，假使万一出眼啥格事体，难么讨杂厌了，一踏路里格“牌头”吃下来，侬是只顾自家放生，人家弄得勿巧就此“饭碗头”拨侬敲脱。现在格特殊情况，大概呒么嘎闹猛伐。

世界浪厢格事体真格好白相，侬心里本来想朝左，实际浪厢跑到右边去了；心里想帮人家忙，结果是越帮越忙，就像放生，到底应该是哪能放呢？师傅们格讲法也是千人千讲，众口勿一，各式各样，哪能办？侬只有拼命盯牢一个师傅，随便伊哪能讲，勿问对错、勿问凶吉，盲从即可，永远勿要去听别格师傅哪能哪能讲，假使讲侬圈子里格佛教信徒太多，东听听，西问问，难么完结，讲勿定侬要调信仰了，真格有人哦，今朝信菩萨、明朝信耶稣、后日信穆罕默德了，稀里糊涂凡是教侪要去兜一圈。好，切回正题，侬去放生、到底要放啥么事啊？放眼鱼，啥格鱼？放眼虾，啥格虾？放乌居，啥格乌居？由于讲法年代久远，真相弄勿清爽了，七传加上八传，就变成七里缠到八里，鞋里缠到袜里了，有人放蛇，而且是放毒蛇，五步蛇，吓人伐？放泥鳅、黄鳝……

2014年11月14日，勒了广州郊区东北角，一个地方叫从化（有北回归线最高标志塔，欢喜自由行格朋友可以去看看）鳌头镇格黄茅村里厢，发生了一桩怪事体，有五只朋友，四只男人、一只女人（抱歉啊，看下去就晓得了，我为啥勿称是一“个”人，而讲一“只”人），开仔一部面包车，垂夜快来到黄茅村，里厢有五只大笼子，装得来“塌塌潽”，啥格么事？侬想猜伐？就算让侬猜到天亮，也呒么办法猜出来，快眼揭开谜底：里厢装满格是“老鼠 ”哦，墨腾赤黑格老鼠，学名叫“坑鼠”，搿种赤佬真是脑子坏脱了，跑到乡下头地里拿笼子打开，里厢格老鼠全部放生到了农田里厢……，同志们啊，搿种场景只有电影里才能看得见啊，是伐？倷讲讲看，哪能会有搿种事体啊？五只脑残朋友是勿是“731”派来格？一个小小格村庄里厢一霎那跑出来了嘎许多老鼠！后来数一数，有一千多只老鼠！太恐怖、实在太恐怖！拿乡下人吓煞脱啦，心惊肉跳，从来呒么碰着过搿种事体，勿晓得哪能办了，倷么一面打110（乡下头警察路远，一时头里呒么嘎快就赶到现场），村委会主任带了一帮小伙子（其实侪是老头子，小青年侪到外头打工去了），拼仔老命，终算捉牢了三只“憨棺材”，逃脱两只，（逃勿脱格，马上拨警察捉牢了）倷么全村动员起来了，捉老鼠！当地政府马上配发了大量格老鼠药……，啊呀，后续故事交关了，总算还好，老鼠查出来倒侪是阴性……，再查，嘎许多老鼠从啥地方来格呢？妖怪了，憨棺材交待，勒了广州最有名格黄沙水产市场里厢买得来格，卖水产格地方哪能会得卖老鼠呢？哦！广东人欢喜吃猢狲脑子，要么也欢喜吃老鼠肉啊……，放生放出来一场闹剧！

侬相信菩萨，信仰自由，但是勿能着相啊，侬懂伐啦？色、受、想、行、识五蕴皆空，侬（人）最终还是逃勿脱“贪、嗔、痴、慢、疑”啊，要“三世轮回”，前世、今生、来世，辰光太长了，呒么多少人等得及！师傅们就告诉侬：因果勿空、真实勿虚，世事勿公，自古有之……。一个人是”相由心生，境随心转”，侬急点啥，侬有慧根，稍加点拨，大彻大悟；侬本愚钝，说破苍天，始终勿醒，佛渡有缘人，说破因果，就无益他人，沉溺因果，人就会变得消极懈怠……。

佛是自然佛，自然佛为佛，人就勒了佛当中，自然成为佛。

师傅们还有一句啥格闲话：信、则灵，勿信、则勿灵；心诚、则灵，心勿诚、则勿灵。

五只憨棺材，只勿过是千千万万信徒当中格“大怪路子”，但是，愚忠愚效格人勿要太多哦，相信“教”格朋友，基本浪厢勿会去搞清爽自家相信格教，侬相信格么事到底是真格？真有伐？还是假格？呒么格？众生就是香圈！

慈悲护生、合理放生！奉劝一句，类似搿帮脑残“憨棺材”格放生闹剧，就勿要再发生了，哪能里厢呒么一只棺材提出反对意见呢？所以讲：圈子，老要紧！

侬有空还是去多读眼书吧，就勿会弄出来嘎憨格《放生》

                           

版权声明：本文内容由互联网用户自发贡献，该文观点仅代表作者本人。本站仅提供信息存储空间服务，不拥有所有权，不承担相关法律责任。如发现本站有涉嫌抄袭侵权/违法违规的内容， 请发送邮件至 sumchina520@foxmail.com 举报，一经查实，本站将立刻删除。

加我微信: sumwb886 备注: 外包

免费领推广引流方案+100种卖货方法